ومطب كبر طويق☆نجم الشعر☆
اليوم ياهل العرف لدي شكوى
ان كان فيكم يالاجاويد جدوى
والا على ماقيل حول الله اقوى
وموضوعنا شايك على الكل واصعيب
قبل اتكلم فيه ياجب علينا
نحب فعل الخير لمواطنينا
محلا التصافي مع تكاتف يدينا
لان النظام يرتب الحال ترتيب
مشيت خطٍ اليوم وعكر مزاجي
شمال بريده حول سوق الحراجي
تقطعت بالجيب اسلاك البواجي
كنك مقطعها بروس المشاذيب
يامواصلات الطرق لكم تحيه
اعمالكم لاشك ميه لميه
مير البلاء ياناس ذيك الاذيه
ادنى مشروع يخرب الخط تخريب
السفلته لوهي كانت جديده
ماتصبح الا وهي مثل العصيده
البلديه كل شيٍ تعيده
وتسريب للمياه وسط الانابيب
من كثر حفر الارض وسط الشوارع
الخط مثل الطعس نازلٍ وطالع
ومطب كبر طويق للجمس شالع
لاواعذاب الناس من الخط تعذيب
وسلامة الجميع وانا صريحي
من عادتي مااقول غير الصحيحي
حتى قصيدي فيه بعض الفصيحي
احب واكره واخطي احيان واصيب
☆نجم الشعر☆نايف بن عبدالله الشويب
|
العضو المميز 
العرض العادي
